Місія

Акадэмічная сетка даследчыкаў Вялікага княства Літоўскага мае на мэце спрыянне лепшаму разуменню і талерантнасці ва Усходняй Еўропе і паляпшэнне акадэмічнага ўзроўню гісторыкаў у рэгіёне праз стварэнне ўмоваў для прафесійнага развіцця, супрацоўніцтва і інфармацыйнага абмену паміж беларускімі, літоўскімі, латвійскімі, польскімі, рускімі, украінскімі і іншымі даследчыкамі, якія займаюцца гісторыяй Вялікага княства Літоўскага.

Абгрунтаванне

Вялікае княства Літоўскае (ВКЛ) у 13-18 стст. знаходзілася ў цэнтры Еўропы, на перакрыжаванні цывілізацый і ахоплівала тэрыторыі сучасных Беларусі, Літвы, Украіны і, часткова, Польшчы (Падляшша), Расіі (Смаленская і Бранская вобласці) і Латвіі. Менталітэт асноўнай часткі ўсходне-еўрапейскага насельніцтва сфарміраваўся збольшага ў перыяд ВКЛ пад уплывам складаных працэсаў, якія тут адбываліся. Таму немагчыма патлумачыць сучасную палітычную, сацыяльную, эканамічную і культурную сітуацыю ў гэтых краінах без уважлівага вывучэння адпаведных праблемаў гісторыі ВКЛ.

Розныя праблемы гісторыі ВКЛ вывучаюцца гісторыкамі, лінгвістамі, юрыстамі і іншымі навукоўцамі на працягу апошніх двух стагоддзяў, аднак вынікі гэтых даследаванняў былі ў асноўнымі сфармуляваны пад уплывам ідэалагічнай і палітычнай сітуацыі ў гэтых краінах. Гэтая сітуацыя моцна ўскладнілася ў 1990-х, калі кожная новая незалежная нацыя пачала фарміраваць сваю тэорыю нацыі і утварэння дзяржавы. Такім чынам Вялікае княства Літоўскае апынулася літоўскай дзяржавай у Літве, беларускай - у Беларусі, украінскай - ва Украіне. Хоць гісторыкі з краін-спадкаемцаў ВКЛ зрабілі вялікі ўклад у вывучэнне пэўных тэм у межах нацыянальных наратываў, жыццёва важным з'яўляецца сумеснае даследаванне агульнай гісторыі, каб пераадолець тэарэтычную, метадалагічную і ідэалагічную абмежаванасць нацыянальных гістарыяграфій. Мы таксама спадзяемся, што дзейнасць сеткі будзе спрыяць лепшаму паразуменню сярод нацый-спадкаемніц Вялікага княства Літоўскага.

Гісторыя сеткі

Ідэя стварэння міжнароднай сеткі даследчыкаў ВКЛ узнікла вясною 2002 года пад час аднаго з семінараў, які праводзіўся ў межах праекту "Школа маладых беларускіх гісторыкаў Вялікага княства Літоўскага". Як след, удзельнікі Школы ўсталявалі кантакты са сваімі калегамі за мяжой, і як вынік была створана група каардынатараў з Беларусі, Літвы, Польшчы, Расіі і Украіны. Адразу пачалося супрацоўніцтва праз электронныя сродкі камунікацыі, вынікам якога стала першая сумесная дзейнасць: каардынацыйныя сустрэчы, гасцявыя лекцыі, даследчыя праекты. У 2003-2004 гг. дзейнасць Акадэмічнай сеткі даследчыкаў ВКЛ падтрымлівалася праектам "Грамадзянская адукацыя".

Мэты

Усталяванне супрацоўніцтва

• прыцягнуць даследчыкаў, выкладчыкаў, маладых гісторыкаў з Беларусі, Літвы, Польшчы, Расіі, Украіны і іншых краін для абмену вопытам і супрацоўніцтва па розных накірунках даследавання ВКЛ,

Інфармацыйны абмен

• садзейнічаць шырокаму інфармацыйнаму абмену па разнастайных пытаннях вывучэння ВКЛ,

Даследчая дзейнасць

• ініцыяваць і праводзіць сумесныя даследчыя праекты па ўзаемна важных тэмах і выдаваць вынікі даследаванняў,

Прафесійнае развіццё

• арганізоўваць мерапрыемствы, якія будуць спрыяць прафесійнаму развіццю навукоўцаў з Беларусі, Літвы, Польшчы, Расіі, Украіны і іншых краін, што прывядзе да павышэння ўзроўню даследавання і выкладання гісторыі ВКЛ,

Прасоўванне

• прасоўваць вынікі вывучэння гісторыі ВКЛ на міжнародным узроўні, асабліва ў краінах-спадкаемцах ВКЛ, уключая, але не абмежоўваючыся навуковай супольнасцю,

Развіццё ўстойлівасці

• усталяваць устойлівыя прафесійныя кантакты паміж даследчыкамі ВКЛ і садзейнічаць стварэнню прафесійнай Асацыяцыі даследчыкаў ВКЛ.